1Cor 9 | NdeIBE | STEP | Kangikhululekanga na? Kangisumphostoli na? Kanje kangimbonanga uJesu iNkosi yethu na? Kalisizithelo zomsebenzi wami eNkosini na?

1 Corinthians 9

Amalungelo OMphostoli

1 Kangikhululekanga na? Kangisumphostoli na? Kanje kangimbonanga uJesu iNkosi yethu na? Kalisizithelo zomsebenzi wami eNkosini na? 2 Lanxa ngingasuye umphostoli kwabanye, impela nginguye kini! Ngoba lina liluphawu lobuphostoli bami eNkosini.

3 Lokhu kuyisivikelo sami kulabo abangisolayo. 4 Kasilalungelo lokudla lokunatha na? 5 Kasilalungelo lokuthatha owesifazana okholwayo owendileyo sihambe laye njengokwenziwa ngabanye abaphostoli labafowabo beNkosi kanye loKhefasi na? 6 Loba yimi kuphela loBhanabhasi okumele sisebenzele ukuphila kwethu na?

7 Ngubani osebenza njengebutho ngezindleko zakhe na? Ngubani olima isivini angadli izithelo zaso na? Ngubani owelusa umhlambi anganathi uchago lwawo na? 8 Lokhu ngikutsho ngokwengqondo yabantu na? Umthetho kawutsho okufanayo na? 9 Ngoba kulotshiwe emthethweni kaMosi ukuthi: “Inkabi ungayifaki isayeke nxa ibhula amabele.” UNkulunkulu ukhathazeka ngezinkabi na?

10 Impela uyasikhulumela lokhu; akunjalo na? Yebo, lokhu kwalotshelwa thina, ngoba nxa umlimi elima lobhulayo ebhula, kumele benze njalo belethemba lokwabelana isivuno.

11 Uma sahlanyela inhlanyelo yokomoya kini, kambe kunengi kakhulu yini uma sivuna isivuno sezimpahla kini na?

12 Uma abanye belaleli ilungelo losizo oluvela kini, thina akumelanga sibe lalo kakhulu na? Kodwa thina kasilisebenzisanga ilungelo leli. Esikhundleni salokho sibekezelele konke kulokuthi sivimbele ivangeli likaKhristu.

13 Kalazi yini ukuthi abasebenza ethempelini bathola ukudla kwabo ethempelini, lokuthi labo abakhonza e-alithareni babelana lokho okunikelwe e-alithareni na?

14 Ngokufanayo iNkosi ilaye ukuthi labo abatshumayela ivangeli kumele bathole ukuphila kwabo evangelini.

15 Kodwa mina angisebenzisanga lalinye lala amalungelo. Njalo kangilobi lokhu ngethemba lokuthi lizangenzela izinto ezinjalo. Ngingakhetha ukufa kulokuthi umuntu angemuke ukuzincoma lokhu. 16 Ikanti lapho ngitshumayela ivangeli, angingeke ngizincome ngoba kumele ngitshumayele! Maye kimi uma ngingatshumayeli ivangeli! 17 Uma ngitshumayela ngokuzithandela, ngithola umvuzo; uma ngingazithandeli, ngifeza umlandu obekwe kimi.

18 Pho umvuzo wami uyini na? Uyilokhu nje: ukuthi lapho ngitshumayela ivangeli, ngilitshumayela kungekho kubhadalwa, ngalokho ngingasebenzisi amalungelo ami ekulitshumayeleni.

19 Lanxa ngikhululekile ngingasuye womunye umuntu, ngizenza isigqili ebantwini bonke, ukuze ngizuze abanengi uma kusenzeka.

20 KumaJuda ngaba njengeJuda, ukuba ngizuze amaJuda. Kulabo abangaphansi komthetho ngaba njengongaphansi komthetho (lanxa nje mina ngingekho ngaphansi komthetho), ukuba ngizuze labo abangaphansi komthetho.

21 Kulabo abangelamthetho ngaba njengongelamthetho (lanxa ngingakhululekanga emthethweni kaNkulunkulu ngingaphansi komthetho kaKhristu), ukuba ngizuze labo abangelamthetho. 22 Kwababuthakathaka ngababuthakathaka, ukuba ngizuze ababuthakathaka. Sengibe yizinto zonke ebantwini bonke ukuze kuthi ngazo zonke izindlela ezingenzakala ngisilise abanye.

23 Ngenza konke lokhu ngenxa yevangeli, ukuze lami ngihlanganyele ezibusisweni zalo.

24 Kalazi yini ukuthi emncintisweni wokugijima abagijimi bayagijima bonke, kodwa ngoyedwa kuphela othola umvuzo? Gijimani ngendlela ezakwenza lithole umvuzo.

25 Umuntu wonke oncintisayo emidlalweni uba sekufundisweni okulukhuni. Bakwenzela ukuzuza umqhele wamaluba ongasoze uhlale isikhathi eside, kodwa thina sikwenzela ukuba sithole umqhele ozahlala ukhona kuze kube laphakade. 26 Ngakho kangigijimi njengomuntu ogijima engahlose lutho; kangilwi njengomuntu onqinda umoya. 27 Hatshi, ngitshaya umzimba wami ngiwenze isigqili sami ukuze kuthi lapho sengitshumayele kwabanye, mina uqobo ngingemukwa ilungelo lokuthola umvuzo.